Денсаулық сақтау

Ауданның медициналық мекемелері

ШҚО денсаулық сақтау басқармасының «Үржар орталық аудандық  ауруханасы» ШЖҚ КМК  

Үржар аудандық орталық ауруханасының миссиясы – емделушілерге сапалы және қолжетімді медициналық қызмет көрсету арқылы тұрғындардың  денсаулығын жақсарту болып табылады. Аудандық ауруханаға келген емделушілерді барынша қолайлы жағдаймен қамтамасыз ететін аурухана қызметкерлерін – өз ісінің білікті мамандары деп атауға болады.
Үржар ауруханасы туралы ең алғашқы мәліметтер 1940 жылғы құжаттардан табылды. Осы жыл аудан ауруханасының тарихын айқындайтын уақыт болып табылады. Мекеме 1940- жылдары 75 орындық аурухана ретінде өңір жұртшылығына қызмет көрсетті. 1949 жылдары хирургиялық бөлімнің бас ғимараты салынған болатын. Ал 1969 жылы аурухананың құрамдас бөліктері ретінде перзентхана, гинекологиялық және балалар бөлімі қолданысқа берілген. 1976 жылы мекеме 315 орындық аурухана болып қайта жасақталып, медициналық қызметкерлердің де құрамы өзгере түскен, атап айтқанда, жоғары медициналық білімі бар дәрігерлердің саны 8-ден 56-ға, орта білімді медицина қызметкерлердің саны 117-ден 320-ға дейін өскен.

Аудандық аурухана болып қалыптасқан уақыттан бастап оны:
Эленек Вильгерм Готлипович – 1942-1967 жж.,
Марченко Иван Михайлович – 1967-1968 жж.,
Ибраев Советқазы Сапашұлы – 1969-1978 жж.,
Рахметов Оразхан Кабдолданович – 1978-1984 жж.,
Сандыбаев Нұрланбек Бөлекбаевич – 1984-2006 жж.,
Мадрахимов Бейсенғазы Аблаевич – 2006-2012 жж.,
Нургалиева Айгүл Мергалиевна – 2012-2013 жж.,
Тлеуберлин Жексенбай Бауенович – 2013-2018 жж.- басқарды.
Абылкасимов Баубек Шайзадаұлы –2018 жылдан бастап тағайындалды.

ШҚО ДБ  «Үржар орталық аудандық ауруханасы» ШЖҚ КМК бас дәрігері-Абылкасимов Баубек Шайзаданович Семей облысы Мақаншы ауданының Мақаншы ауылында 1971 жылы 2- маусымда дүниеге келген.
«Қоғамдық денсаулық сақтау» мамандығы бойынша жоғары, «Терапия» бойынша бірінші біліктілік санаттары бар.«Менеджмент» мамандығы бойынша «Экономика және бизнес» магистрі.
Медицинаның дамуына қосқан жеке үлесі және жоғары кәсіптілігі үшін «Еңбек сіңірген мемлекеттік қызметкер» орденімен,«Қазақстан Республикасының Тәуелсіздігіне 25 жыл», «Үржар ауданына 90 жыл», Кедендік одақ елдері халықаралық «Лучшие люди» энциклопедиясының батыры, Қазақстан Республикасының Ұлттық Медицина Ассоцияциясының «Алтын  дәрігер», Денсаулық және әлеуметтік даму министрінің «Денсаулық сақтау ісінің үздігі»; Семей қаласы Мемлекеттік Медицина Университетінің «Ерекше еңбегі үшін» төс белгілерімен марапатталған.  

Еңбек жолында Баубек Шайзаданович өзін еңбек сүйгіш, адал,  жауапты және білімді маман ретінде көрсетті. Өзіне және қызметкерлеріне талап қоя біледі. Ұйымдастырушылық қасиеті басым, қызметтік және психологиялық жайлылық орната алады. Б.Абылкасимов алдына қойылған тапсырмаларды әріптестерімен бірге уақытында орындау арқылы  ұжымда құрметке ие. Үнемі өз білімін, санаттық және кәсіби деңгейін артырып тұрады, диагностика мәселелерін игерген.
Баубек Шайзадановичтің басқаруымен аудандық аурухана көптеген жетістіктерге жетті.

2018 жылы елді мекендердегі тозығы жеткен медициналық мекемелерге толыққанды жөндеу жұмыстары жүргізілді. Атап айтсақ Малақ, Текебұлақ, Айтбай фельдшерлік акушерлік пункттері, Үржар аудандық ауруханасының емхана бөлімінің 3-қабаты заман талабына сай жөнделіп, жиhаздармен қамтамасыз етіліп жатыр.

Маман тапшылығын жою бағытында 8 дәрігер қайта даярлау курсынан өткізілді. Бүгінгі таңда бұл мамандар халыққа қолжетімді, сапалы қызмет атқаруда.
«Цифрлы  Қазақстан» мемлекеттік бағдарламасы аясында Облыстық денсаулық сақтау басқармасы 224 дана компьютерлік жиынтықпен қамтамасыз етті. Сонымен қатар Үржар аудандық ауруханасына қажетті медициналық құрал-жабдықтар сатып алынды. Ғаламтор  желісімен қамтамасыз етілген, жеке сайт, колл- центр жұмыс жасайды. Емделушілер үшін «ОТАУ-ТВ» орнатылған.
Аурухана аумағында көру қабілеті төмен жандарға арналған түрлі-түсті бағдаршалар, ішкі және  сыртқы видео бақылау орнатылған. Жасыл ел бағдарламасы бойынша мыңдаған түп гүл егу, тоғайландыру саясаты жүзеге асырылуда.
Жыл сайын аудандық ауруханада 5 мың адам емделіп шығады.

2018 жылы 1-қаңтарына жиналған мекеме алдындағы 190 миллион қарыз мөлшері 2019 жылы 1-қаңтарына толықтай жабылды.
Елбасы Н.Ә. Назарбаевтың сындарлы саясатының аясында еліміздің денсаулық сақтау саласын одан әрі дамытудың тиімді шаралары белгіленуде. Мемлекет басшысы «Қазақстандықтардың әл-ауқатының өсуі: табыс пен тұрмыс сапасын арттыру» атты жолдауында:  Медициналық қызмет сапасы халықтың әлеуметтік көңіл-күйінің аса маңызды компоненті болып саналатынын  атап өтті.    
Жолдаудың негізінде:
2019 жылдың 1-қаңтарынан бастап ең төменгі жалақы 1,5 есеге, яғни 28 мыңнан 42 мыңға дейін өсті.

«Алғашқы-медициналық-санитарлық» көмек көрсететін қызметкерлерді ынталандыру үшін 2019 жылдың 1-қаңтарынан бастап ауруларды емдеу ісін басқарудың жаңа тәсілдерін еңгізген учаскелік медицина қызметкерлерінің жалақысы кезең-кезеңімен 20 пайызға көбейтілуде.

2019 жылдың 1-қаңтарынан бастап барлық емханалар мен ауруханалар медициналық құжаттарды  қағазсыз, цифрлық нұсқада жүргізуге көшіп жатыр.
Қазақстан Республикасының денсаулық сақтау саласын дамытудың 2016-2020 жылдарға арналған «Денсаулық» мемлекеттік бағдарламасын бағытқа ала отырып, сапалы және қолжетімді медициналық қызмет көрсетуді қамтамасыз ету мақсатында, Үржар аудандық медицина саласы бойынша, 2018 жылы төмендегідей көрсеткіштер толықтай орындалды.

  1. 2019 жылдың қаңтар айына дейін 1111 бала дүниеге келді, табиғи өсім 524 адамға көбейді.
  2. Жалпы өлім-жітім 8,7% азайды.
  3. Ана өлімі тіркелген жоқ.
  4. Туберкулез ауруынан өлім-жітім 50% азайды.
  5. Обыр ауруының аурушаңдығы 15,4%, қатерлі ісіктен өлім-жітім 8,4% төмендеді.
  6. Қан айналу жүйесі ауруынан өлім-жітім 9,2% азайды.
  7. Оқыс жағдайлардан, улану және жарақаттардан болған өлім-жітім 27,9% төмендеді.

Бүгінгі күні Үржар орталық аудандық ауруханасында 592-қызметкер жұмыс атқарады, олар 105-білікті дәрігер, 321-медбике, 2-психолог,
3-әлеуметтік қызметкерлер. Дәрігерлердің біліктілігі-51,3 пайыз, медбикелердікі-85,3 пайызды құрайды. Аудандық аурухананың барлық ұжымы ауданымыздың денсаулық сақтау саласын дамыту және жаңа технологияларды еңгізу жолында қызмет атқаруда.

 

Парақтар өзгертілді: 03-06-2019